أن الدافع لدى لكتابة هذا المقال هو فى الحقيقة حرصى على صحتى وسلامة قواى العقلية.فلو استمر وضعى على ما هو عليه أخشى أن افقد عقلى أو اصاب بسكتة دماغية أو ازمة قلبية واسقط شهيد الهبل والازدواجية واللا منطقية.
أنا منذ قررت أن امتهن مهنة الصحافة وأنا لا أعرف لها مدخل ولا منطق ولا شىء على الاطلاق.فلو سألتنى سؤالا بسيطا عن كيف يكون المرء فى مصر صحفيا أقول لك : "معرفش!!".حتى لو كنت خريج كلية الاعلام أو احد اقسام الصحافة والاعلام فى اى جامعة فيكى يا مصر فلن تعرف .
فاذا ما حاولنا بهدوء أن نتتبع المسألة بشكل قانوني سنجد أن الصحفى هو من يحمل كارنيه نقابة الصحفيين وبالتالى له حق مزاولة المهنة . حتتفزلك وتقول لى جميل أذهب وأحصل على الكارنيه .أقولك علشان تحصل على الكارنيه أنت محتاج جريدة أو مجلة تعينك فيها وهذا ايضا يتطلب وسطة .ستقول لى عارفين الكلام ده كله، ما دى بلادنا وده العادى.ح أقولك ماشى أسمع بقا يا سيدى اللى موش عادى.
علشان جريدة تعينك أنت مطالب بالعمل والبهدلة لدى هذه الجريدة لمدة زمنية غير محددة(تصل فى بعض الحالات الى 9 أو 10 سنوات) بدون راتب أو تأمين أو أى حاجة تثبت أساسا أن سيدتك صحفى أو بتنتمى لهذه الجريدة؛يعن لو أتقفشت محدش يعرفك. الاجمل فى الموضوع ان تعيينك بعد كل هذا الهوان غير محتم ..وهو ايه ف الزمن دا يا ابنى مضمون.
طيب نفترض جدلا أنك قادم من عصر العبيد ،وأن سيدتك معندكش مشكلة بخصوص الاستعباد والذل بلا مقابل لفترات غير محددة وقررت ان تبدأاللعبة فمن اين ستنفق على نفسك( طعامك -شرابك- انتقالاتك- ..الخ) طبعا ستجد نفسك مضطر أن تبحث عن عمل بعد الظهر كى تنفق منه على عمل الصبح. ستجد نفسك أمام ازمة أخرى وهى أن العمل اما دوام كامل (12 ساعة)و ساعتها لن تجد وقتا للصحافة او للكنافة حتى ،او دوام جزئى(6 ساعات) وستحصل على راتب تافه لا يكفيك حتى نصف الشهر مواصلات.
السؤال الأن: "أمال الصحفيين اللى بنشوفهم ف التلفزيون دول بقوا صحافيين ازاى؟".والله يا ابنى سؤالك وجيه..ودا يدينى انطباع انك عندك عقل وح تفهمنى .واجوبك واقول: لو تقصد بالصحفيين بتوع التلفزيون (رؤساء التحرير ونواب رؤساء التحرير..الخ) فهؤلاء اصبحوا صحافيين أيام عبد الناصر يعن أيام الرخص لما كان عدد سكان مصر ثلث عددهم الأن وكانت القوى العاملة(الله يرحمها ويحسن اليها ) بتعين وقتها .أما لو كنت تقصد شباب الصحفيين فدول بينقسموا الى أبناء صحفيين و اعلاميين (ودول مفهوم اتعينوا أزاى )أو شباب طلع فى هوجة انفتاح الجرايد وانتشارها من 10 سنوات فاتت واعدوا مذلولين لحد ما ربنا فرجها عليهم واشتغلوا .أما اليوم فالجرائد ( حتى الجديدة منها )لا تتعامل الا مع الصحافيين اللى معاهم كارنيه يعنى اللى هما معينين أصلا فى جرائد تانية . يعنى بالمختصر هناك صحافيين معاهم كارنيه وشاغلين نار فى أكثر من جرنال، وصحافيين مع وقف التنفيذ لا معاهم كارنيهات ولا شغالين فى حتة. وعلاشان متقليش فين النقابة ..النقابة غير معترفة بيك أصلا أنت منتظر أيه.
كل النقابات اللى فى الدنيا تعطى كارنيه علشان تقدر تزاول مهنة الا نقابة الصحفيين تزاول الأول وبعدين تدي الكارنيه ..بس تزاول مين طبعا أنت فهمت.
طبعا موش محتاج أقولك انى من الصحافين اللى بدون كارنيه ..وعايز أزاول بس اللى أنا ملاحظه لحد دلوقتى انى بتزاول بس..وربك كبير.
ليست هناك تعليقات:
إرسال تعليق