الجمعة، 18 يوليو 2008

من كام سنة..



من كام سنة.. أو أكتر
جوايا حلم بيكبر
لانا عارف أوصل ليه..
ولا عارف أن كنت اقدر

تايه ف متر ف متر
بكتب على سطر وسطر
اتقدم زى النملة
واتأخر زى القطر

والف وادور وادور
واستنا مكانى ف الدور
والعمر يخدنى ويجرى
وشهور بتجيب ف شهور

وامشى ف طريق ..وأمد
وانده..ولا حد يرد
واوصل ف طريقى للاخر
القا الاخر ده ..سد

حيران مش لاقى السكة
معكوك حتة دين عكة
ولا صاحب يجى يغيتنى
أصحابى طلعم سكة

مش عارف اطول احلامى
و ورايا بقا قدامى
عمال اتكلم وارغى
ولا حد واصله كلامى

بكتب وكتابتى ..حروف
والدرج مصير معروف
وأنا ح أكتب برضه..واعافر
لكن اكتب وأنا مقروف؟!

عمال اخد على راسى
والهم كاتم انفاسى
لو افكر يوم اتحمس
القاهم قتلوا حماسى

مشدود ف سواقى بلف
عيان..ولا عمرى ح اخف
لما احلم اطلع فوق
القانى فوق..ع الرف

بس أنا ناوى اتغير
أنا نفسى ماعدش قصير
هاصبر وح احقق حلمى
أكبر احلامى ..صغير

ومسيرى يبان لى مصيرى
وأخد على قد ضميرى
وتطرى وتحلو معايا
زى ما حليت مع غيرى